سلام عليكم العائلة هاد ليلة قررت نهضر على بموضوع السيكولوجية العكسية ،بداية فهاد الموضوع غانطرقو لبزاف ديال النقط أهمها :


  • أشنو هي السيكولوجية العكسية؟
  • كيفاش كانعيشوها فحياتنا و نطبقوها بلا مانحسو؟
  • أشنو رأي علماء النفس فيها؟
  • وأشنو الدور ديالها على الأطفال؟

" أول حاجة بغيت نقوليك ماتقراش هاد المقال من فضلك "


يمكن تكون درتيها مرة و جوج و تلات ولا بزاف دالمرات ،و نتا ماعرفش أنها كاتسمى " علم النفس العكسي " ،هاد علم النفس العكسي هوا واحد المفهوم يخليك تقنع شخص أخر باش يدير شي فعل ،بعد مايكون اليقين ديالك أنه ماغديش يديرو يلا طلبتيه منو بطريقة زوينة أو بأسلوب لطيف ،إذن نتا كادير عليه الاحتيال نفسيا بالطلب ديالك لي يكون عكس لي نتا باغي تماما ..
على سبيل المثال : شي صاحبك كاتقول ليه أجي نتفرجو فواحد الفيلم أولا فيديو د الرعب ،ولكن للأسف راسو قاصح ماكيبغيش ،إذن نتا هنا غاتقول ليه : انا غادي نتفرج ليه بوحدي حسن منك الخواف ،فطبعا رد الفعل ديالو غايكون تحدي وغادي يقولك زيد نتفرجو.
كاتقول الدكتورة " جانيت ريمون " أخصائية و معالجة نفسية بلوس أنجلوس : " علم النفس العكسي غالبا كايكون ناجح في اقناع الطرف الأخر ،ولكن بأنك تقوم بعمل ما بالإرادة الكاملة ديالك هو أفضل من أنك تقوم بها بالتهديد ولا الخوف من أنك تخسر علاقة الطرف الأخر معك ".
مثلا كنتي كتناقش موضوع إنجاب الأطفال مع مراتك. وانت متأكد من أنها حتى هي باغا تبدا ف تكوين أسرة من دابا، لكن هي كتقول بلّي خصنا نصبرو حيت من الحكمة نتسناو واحد الشوية ومانزربوش. انت غادي تقول: “واخا، نتسناو عامين أخرين”، ربما غادي ترد عليك وتقولك عاميين !! لا باغا وليدات قبل من هاد الفترة، الا ماقالتش ليك بغيتهم دبا.
هاد الأسلوب مرتبط بالتدخل المتناقض والعكسي ف الرسالة للي موجهة للشخص، حيت كلما كان داكشي للي قلتي ليه فيه نوع من التحدي بلا أسباب واضحة كلما ولّا صعيب عليه يقاوم الرسالة وعليها كتزاد احتمالية أنه يدير العكس ديال داكشي للي طلبتي منّو..
كاينين بزاف من الأمثلة ديال السيكولوجية العكسية للي كادوز على الإنسان يومياً بلا مايشعر بيها، وهاد الأسلوب كايستخدموه ف الروايات والخطابات السياسية، والسينما، والاعلانات والرسوم المتحركة، وغيرها. 
من الأعمال للي استخدمو فيها هاد الأسلوب كانت مسرحية "يوليوس قيصر" لشكسبير، ملّي استخدم "مارك أنتوني" السيكولوجية العكسية باش يخلّي الناس للي ف البلدة كاملة ينوضو يديرو أعمال الشغب.
في المجال ديال الطب النفسي المصطلح الصحيح ديال طب النفس العكسي هو "التدخل التناقض " فهاد العملية كايقوم الطبيب النفسي بالطلب من المريض النفسي انه يتناقش معاه فواحد السلوك ماعجبوش باش يحاول يبعد عليه ،ويلا مثلا هاد الشخص كان عندو مشكل مع الكدب ،فنصيحة المعالج النفسي غادي تكون بلي غادي يطلب من المريض النفسي أنه يكلس و يبدا يطلق عليه السلوكية لمدة ساعة كاملة يوميا بدون توقف ،حيث هاد العملية غادي تخلي المريض أنه يركز أكثر على هاد السلوك الغير مرغوب والأسباب ديالو ،وفالأخير النتيجة غادي تكون أن المريض غادي يلاحظ أن السلوك ديالو طوعي وبالتالي غادي يحاول يبدا يشد الحبل لداك السلوكية ،حيث غادي يعرف مزيان أن التحكم هو الأسهل بزاف ملي كان هو براسو متوقع ..
علم النفس العكسي بالنسبة للأطفال ،أي شخص سبق ليه و تعامل مع الأطفال هو و بلا شك استعمل سوية ديال علم النفس العكسي ،فواحد التجربة تم طلب من جوج أطفال في عمرهم عامين باش مايلعبوش بواحد اللعبة ولكنهم وبجوج أصرو يلعبو بداك اللعبة بالتحديد ..،حيت عارفين مزيان العناد ديال عقلية الطفل الصغير ،داكشي علاش باش تستعمل علم النفس العكسي ﻣﻊ ولادك او خوتك صغار غادي تهنى من بزاف ديال الرغبات المزعجة فيهم ،راه مزيان تستعملو فبعض الحاجات التافهة ﻭ لكن يلا بقيتي تخدم بيه يوميا وبلا فرانات فراه الطفل غادي يعيق بيك و الطريقة ماغتبقاش فعالة وخير مثال هوا كلنا كانو بخلعونا فالصغر بشي حاجة ولكن وحنا كنكبرو وحنا كانولفو ان هاديك غي خرافة او شخصية خيالية ..،
إيوا مبروك عليك حيت وأخيرا هانتا قريتي ..،وطبقت عليك الفكرة ،

نتمنى تكونو استافدتو بالصح من هاد الموضوع ..


#تعيش_العائلة 🎩
بقلم : #PsyNoir 🖤