سلام عليكم العائلة المهم موضوع الليلة غايكون فلسفي بزاف و غانطرقو فيه لعديد من النقط غادي نسطر ليكم أهمها ولي غاتقسم على ثلاث أجزاء ..
  •  مصطلح العبثية لي رجعنا نسمعوه بزاف و معارفينش اش كايعني بالتفاصيل ؟
  •  شكون هو ألبير كامو و كفاش كتب رواية الغريب لي تشهرات بزاف ؟
بلى كترت المقدمات غانهضر على #العبثية

فالجزء الأول غانعرفكم بألبير كامو ولي تزاد عام 1913م في الجزائر ولكن كان فرنسي الأصل ،و كانت فرنسا هي الوطن ديالو و كان منتمي لحزب الشيوعي الفرنسي ،و زيد عليها أنه من أعضاء الأكاديمية الأمريكية للفنون و العلوم ، قرا ألبير فالجزائر حتى تخرج من كلية الآداب بجامعة الجزائر ،و لغته الأم هي الفرنسية و هي لي كتب بيها جميع أعمالو الأدبية ، و من أشهر الأعمال ديالو رواية السقطة ، و أسطورة سيزيف ، و رواية الغريب ..

أ ما بالنسبة العبثية بداها واحد الفيلسوف دانيماركي سميتو "سورين" ولكن الفيلسوف ألبير كامو هو لأسسها منبعد ما حبس الكتابات ديالو فالفلسفة الوجودية كتب وبدا رحلة ديالو مع العبثية وكتب مقال سماه “أسطورة سيزيف” و حيت كامو لي أنشأها دكشي علاش ارتابطات العبثية بالعدمية والوجودية..

وفالمقال ديال أسطورة سيزيف كايقول 
” العبث : بحث الإنسان عن المعنى، وتطلعه لوحدة العالم و وضوحه، في عالم غير مفهوم، عالم من دون إله ومن دون أي حقائق أو قيم خالدة. ويتسائل هل الإحساس بالعبث يدفع للإنتحار؟ ثم يجيب “لا” بل يدفع الى الثورة “

هاد المقتطف وإسم المقال سيزيف بوحدهوم إشكلو مقال بوحدهوم المهم غانعطي داكشي لي فهمت أنا من المقال بلى مانطول عليكم ..

سيزيف هو واحد الراجل دكي بزاف زرب على إلاه الموت ثانتوس و دار ليه المينوط ديال ديك الوقت وهكداك منع إلاه الموت من قتل الناس ولكن هادشي ماعجبش الإله زيوس وحكم على سيزيف يهز واحد الحجرة من لتحت دواحد جبل وملي كايقرب اوصلها كاتطيح عليه الحجرة وإعاود من جديد الى ما لا نهاية...

وهادشي علاش بنا كامو المقال ديالو وشبه الحياة بالعبثية و أنها ماعندها حتى شي معنى .. حيت ماعندها تا معنى سيزيف ادير نفس المهمة كل نهار وبلى مايوصل لحتى نتيجة وطرح بزاف تسائلات من بينها

  • شنو الهدف من هاذ الدنيا ؟
  • شنو الهدف ديالنا من العيش فعالم محكوم بالزوال؟
  • شنو الهدف من الخدمة ؟
  • شنو معنات تزاد باش تموت ؟
  • شنو معنات تأمن بمعتقدات وأفكار فواحد العالم مافيه حتى شي حقيقة مطلقة؟

نرجعو نشوفو أش كايقول كامو على العبثية : 
“العبث ليس هو العالم ولا الإنسان وإنما العلاقة التي تربط العالم بالإنسان " 
وهاد العالم برأيه ماشي عبثي وإنما لا عقلاني ماعندوش اللوجيك ...
وهنا كاتفهم حاجة وحدة وهي أن العقل ديال الإنسان محدود ميقدرش إفهم الوجود حيت هو لا عقلاني فالأساس ،وكايزيد يصدمك كامو ويقول ليك أن العقل هو الوسيلة الوحيدة باش توصل للحقيقة وهذا هو تناقض فاكيفاش غادي توصل لهاد الحقيقة والوجود مافيه حتى شي حقيقة ثابتة قمة التناقض لكن لا هادي قمة العبثية...

وكايزيد كامو "أن العبث هو ديك رغبة المجنونة في الوضوح فعالم لا عقلاني" يعني فهم تسطى والى مافهمتيش فراه مكايهمش واش فهمتي ولا لا العبثية كاتبقى بلى معنى محدد وأي واحد غايعطيها تعريف حسب نظرة ديالو للحياة وحسب طريقة الجواب ديالو على الأسئلة لتطرحو الفوق ،

هذا ماكان على الجزء الثاني من الموضوع ،و دير ف بالك كن عبثيا أو مت وأنت تحاول وكامو هو كاتب رواية “الغريب” ليكاتحكي على شخص قمة فالعبثية

ودابا الجزء الثالث لي غانهضر ليكم على رواية الغريب لي تنشرات أول مرة عام 1942م و هي أول رواية كتبها ألبير كامو و كاتبع المذهب العبثي ، زيد على أنها وحدة من مجموعتو الأدبية سلسلة دورة العبث ، منين تنشرت هاد الرواية كان ألبير فعمرو 25 عام و هادشي لي جذب ليه الأنظار ، حيت حققت الرواية نجاح كبير بزاف و ترجمات لأكثر من أربعين لغة ، زيد على أنها كاتدرس فبزاف ديال الجامعات عالمية. .

الشخصيات الرئيسية للرواية :

  •  ميرسولت : هو جزائري فرنسي ،كايتميز بالصدق و صراحتو ،وكاع مامسوق الحياة لدرحة ماتت مو و ماتحركات فيه حتا حاجة .
  • والدة ميرسولت : وضح كامو حياتها فبداية الرواية ،ووضح أنها مشات تعيش فبيت قديم ديال العائلة قبل ماتموت ب3 سنين.
  • ريموند ساينتيز : هو عشير ميرسولت ، لي تعرف عليه فالظل و غايوليو عشران ديال بالصح و هو لي غادي يعتق ميرسولت من الإعدام .
  • ماري كاردونا : هي كاتبة طوابع في نفس البلاصة لي خدام فيها مارسولت ، و لي تعرف عليها نهار ماتت مو و تطورات علاقتهم لعلاقة حب .
  • مايسن : واحد السيد كالم و منعزل ،و عنو واحد الدار حدا البحر لي اقترح ريموند على مارسولت و ماريا مايسن يدوزو فيها شوية ديال الوقت .
المهم نتمنى تكونو استافدتو شوية كيف العادة 

#تعيش_العائلة 🎩
بقلم | #PSYNOIR🖤